CARD Thawngthanh (February 2009)

CARD THAWNGTHANH (11 February 2009)

Hmunkip um mi CARD Unau hna,
x
Nan dihlak lunglawmhnak chimcawk lo he nan kut kan in tlaih hmasa hna. Pathian daihnak nan dihlak cungah um ko seh. CARD cu CARD minung nih dirh mi le thawk mi a si ban tuk in CARD minung nih a dirkamh le a tanpi cu a sining ding hrim a si tak ko. Nihin ni tiang lungthin khat kan tanti minih rianhma tampi a kal ter ti hi mithmuh kut tongh a si. A bik in Ramleng um kan Unau hna nan thazang in CARD ramchungah riantha tampi nan rak tuan cuahmah mi kan rak hmuh tikah kan lung aa lawmh lawng si lo in nan lungput le nan thiltha tuah mi cungah upat hmaizahnak zawng tampi kan in pek hna.

- A tu zawngah CARD Kumhra tlinnak(Tin Jubilee) Magazine chuahnak ding caah tiah Australia um mi kan Unau hna nih Sponsor an kan tuah i phaisa ks.1060000/- an kan kuat, an cungah lawmhnak chim cawk lo kan ngei. Pathian nih a letza in thluachuah pechin ko hna seh tian thlaza kan cam piak hna.

-A luancia mi 2008 chungah Denmark um kan Unau nih Lothlo kutken chuahnak caah Sponsor an kan tuahmi zawng kan lunglawmhnak kan rak langh ter cang bang in a tu zawngah nolh than rih kan duh. Lothlo kutken hi Laitlang Myone 9 chung in an duh i Lai ca a rel kho mi pouh nih an kan cawk,Kawl ca in rak kan leh piak uh tiah Request zawng an kan tuah.A tu zawng Vol III le Vol.II print tuah than kan timh cuahmah.Mitampi caah thahnem santlai a si ko ti kan hmuh tikah mitampi caah riantha nan tuan ti a lang . Pathian nih nan thiltha tuahmi hi a theipar tampi chuah ter chin ko seh law nan thluachuah hmuhnak zawngah cang ko seh tiah thlaza kan cam.

-A tu zawngah Sponsor nan kan tuah ciami pawl hi a nunpeng khawh ding kan i zuam , a zin a chauhnak in aman fak tuk lo in kan zuar i hmaileiah pehzulh tein a dang cauk thatha zawng kan herhmi leh ding tampi kan ngei rih.Pathian tunih lam kan hruai cio ko seh.

- Cun a tu Tin Jubilee Magazine hi chuah colh kan duh ngai nain kan duhning in Capar kan hmu rih lo. Groupmail ah a tu le a tu kan rak thlah, pumpak in nan mail kan theih dih khawh lo caah. Ramleng in kan orhning tluk in kan hmu rih lo. Cu caah dawtmi Unau hna hi Magazine hi CARD Tuanbia tial thawknak pakhat a si ve caah kan Laimi caah le CARD caah nan siaherh mi, Hmuhning, Sermon, Ngandamnak lei,Fimthiamnak lei,Chawlet chawhrawlnak lei ruahnak pekduh mi le siter duh mi tiang in Capar nan rak tial khawh cionak lai kan in sawm than rih ko hna . Lailei cu a chuak pah ngai cang, nanmah kan in orh ko hna. Cun a tu hi kan hmuh chom in kan rak khumh chung cuahmah ko lai i kan lungduh ning in tlam a tlin hnu lawngah kan chauh te ding a si.Feb-April ,2009 ah chuak kho seh ti saduh kan thah.Phaisa tampi dihin tuahmi a si caah le a voikhatnak CARD Tuanbia tial thawknak a si caah lungsau deuh in tuah kan timh ko. Tlamtlinnak tiang Pathian le nanmah cio kan in bochan ko hna.

-------------------------

-Ara laimi CARD BM cu Lautu Baptist Church Kalymyo ah March 17-19, 2009 tiang Consultation tuah chih a si lai.

Ruahnak pek duhmi siter duhmi zeitik can pouhah thinlung ruahnak langh ter khawh a si.Lunglawm tein kan in orh peng ko hna.

Lunglawmhnak chimcawk lo he,

Ngai Men
Camp/- Yangon

THAWNGTHANH (6 February 2009)

Hmunkip ummi CARD Unau hna,

x

Nan dihlak sinah CARD thawngpang tete kan vun in theih ter than hna. Nan rianlak cio a si lai caah nan relmanh can zawnga um lai i nan relmanh lo can zawng a um ve lai ti kan rak theih thiam. Kanmah lei thawngpang tete a ummi cu a can kan ngeih chung pouh kan rak in thanh lengmang ko hna lai. A rel manh mi pakhat hnih te tal nan um i nan rak theih zawng kha a tha hnem ko lai ti kan zumh kan tha a chia lo.

x

-Thawngpang,

x

-CDCE (Community Development and Civil Empowerment) Chaingmai ah thlathum training kai ding in CARD Volunteer Pastor Ram Nawn cu Feb,15 ah Chaingmai ah thawh ding a si cang.

-GLT (Grassroots Leadership Training) kaiding in timtuah mi Pastor Khin May Than (LABC Woman Secretary) cu kaiding in cohlan a si cang i a tu hi Rangon ah Pasport a tuah cuahmah lio a si. Pathian sinah tlamtlinnak tiang thlacamnak in bawmchan cio hna uh sih.

-Lautu, Mara, Zophei Mautamm bawmhnak kongah khuathlang lei kan Unau hna he hmuh tonnak an ngeih mi ah hna bei seinak nganpi kan ngei ko. UNDP le CAD pawl bawmhnak zawng facang in an phorh cuahmah lio cio pi a si.

-CARD programe in Aluan ciami pam bawmhnak kong he pehtlai in thil umtuning kha kan hnu lei a hnu bik thawngpang ah kan vun langh ter cang. Feb. 1, 2009 ah khan Rev. Khen Cham he Senthang ah kan va kal. Bung Tuah le Lung Hau le Sumsi nu le pa le Association GS tiah tawnnak kan ngei. 2008-09 chung ti le rawl an lak ning kan hal tik hna ah ngeih a chia lung a fak ngai ko. Zuu a zualnak bik an si i kumkhat chung an thlawh mi an lo ah pungkhat a la lo mi hmanh kan um an ti. Inn khat nih punng nga pung ruk hna kan lak i atu hi kan ba ngai cang ko an ti. An nih hi alklawhnak cu NGOs pawl nih an phan kho hna lo. Khua thlang lei bawmhnak nih le a phan kho lawlaw ve hna lo. CAD pawl nih le an phan deuh ve hna hawi lo. A cozah nih hin kan hnu leiah khan facang 30 an kan bawmh an ti i, tun tan cio hmanh kan ting lo an ti. An khua pawl hi Motor luh khawh lonak a si tikah NGOs dangdang an tin mi zawng an mit nih ahmuh khawh hna lo tikah bawmh awkah an ruat hna lo a si lai cu laklawh ngai in le har ngai in zingzan eidin kongkau ah lung rethei ngai in a um ve mi an si.

--------------------

CARD tal nih a zei ti lei tal bawmh chanh khawhnak a um lai maw ti tik ah kan hnu lei Indianapolis ummi Unau hna nih ks. 3000000/ kuat michung ahkhan 2200000/ kha Mara ah kan kal ter i ks. 800000/ lawng Senthang ah a phan cang. Khua khat lawng an si lo tikah a phawtzamnak ah lung rethei ngai in kan um. A va tlawm le a tam ah si lo in kan Unau hna nih kan harnak an kan theih pi ti nih hna a ngam ter an ti an lung aa lawm hringhran. Nan ca zawngah Pathian sinah thluachuah hal piaknak zawng an in ngeih hna. Dawtmi Unau hna Pathian tunih lam in hruai chin ko hna seh. CARD cu NGOs le a a dangdang nih an phanh khawh lonak khuate taktak ah rian a tuan mi kan si hi Pathian duhpi mi a si ko lai. Kanmah le kanmah kan i bawmhchanh loah cun a ho dihdah a kan bawmh chanh kun i a kan hmuh khawh kun hnga. A tu ah nan riantuannak cioah nan har ngai ko ti kan hmuh. Hi tluk hae bu in harnak a tong ve mi kan Unau hna cungah, Pulthih nih sar thih hramh ti lungput in riantha nan tuan mi hi a sungluai tuk hringhran. Pathian mit hmuh zawngah a sungluai ko lai ti kan zumh. Pathian tunih a thluachuah za he lam tha in hruai chin cio ko hna seh.

-Cun a tu hi kan hnulei piin kan rak thanh lengmang cang mi CARD Tin Jubilee Magazine chuah ding tawl rel le adangdang Zung rian a herh mi a tampi caah Rangon ka rat lio a si. Article halnak ca tuan pi in ka rak tial cang mi kha a hmu lo tawk zawng nan rak um kho men. Siaherhnak taktak taktak he nan rak kan tial piak cionak lai zangfah kan nawl chih rih ko hna. A tu in vun kan zuam piak cio uh law February thla dih chung hlan pouh kan sin a phanh khawhnak lai kan duh ko.

Lunglawmhnak tampi he,

Ngai Men

Field Director

CARD, Camp/- Yangon